بخشی از یک داستان بدون ویرایش و ترجمه
سیگه گو هووفته بویی یه بار می دی رقیه یی یومه پیشوم . ورف یومیه بوی . همه ییا سیفیدی سیفید بوی . کاوندولا و گوندوجکا شیوی ورف وبوین . تا چش کاروشی که سیفیدی ورف بوی . رقیه یی وروش مالا و می جی وردوش شویی . دارتم کایه می که . می مالی دو دوته چوم وسا . دلوم شی پیا نومزیوم بوی . دارتم نومزی بازی می که . از تویی ورفا وروتوسا و وروش مالا . می جی وردوشومو نا . وشوم وات یور تا وروفو و دوشو اوخورم . شوات خوی چی ؟ موات دوهمه ورف . ایوین . یه کاسه چوم از شیوی پرنم برارت . موشتی وروفوم توش ریت . شوات کو دوشوش ؟ موات هونا . از هیمی خونی گو از کله م ریته بوی یه چنته م ورگیرفتو می ریت توکاسه . قاطی پاطی م که و موات ایفرما . اوسمی اوخور .رنگی ورفو و دوشو گرتایه بوی . موات ایوین چه وروفو و دوشوی خوشمزه یی . انگولی شوش توش که و وروش گیرفت تا اوخوره . یه دفه پوفوش که و از دهنوش بروش ریت . شوات تعلو . مالی تعلو . مثی زهری مارو مونه . دوشو گو سیگه نهو . ورفو و دوشو شیرینوخره چو . موات دوجی شیرینو . شوات نه تو خونوت تعلو . می ناخوری .سیگه ش اوواتو و دوباره وروش مالا . جیغوم زی هگیر، خوشمزه هو . گو یه دفه وهوش یومی یی . انجموم یه کاسه شورباش پخته بوی و شوات هگیر اوخور . مالی وششم بوی . شوربام اوخا . مالی خوشمزه بوی . بعدها کله م خوب گرتا . اصلن ویروم وشوی گو یه رویی سیگه از دیرخت درکفته بویی . ولی هیچ وقت ویروم ونشوی گو رقیه یی چیش و می واته بوی . می نم زونا معنی یی دو حرفوش چی بوی . وقتی مسه گرتایی می فهما . وقتی گو اون یه دوتویی خوشگل گرتایه بوی و بعد عاروسی ش که . انجویی حسینی خالو گرتای . هنوم جی وقتی ویروش وکی دو حرف تو مغزوم چرخ اوخوره : تو خونوت تعلو . راستوش اووات . می خونوم تعلو ولی ورفو و دوشو شیرینو. مالی جی شیرینو!