عاروسی

محمد علی عسگری 

( هرگونه نقل یا رونوشت از این داستان تنها با ذکر منبع مجاز است ) 

سِری مِیدونی حوسابی وَ وِیستایَه بوی . کوناری چرخی بَسِّنی فروشیش .. هِی جیغُّش ورو دارت گو: بَسَّنی ... نوبَره بهاره بَسَّنی .. هِراِز چِن گاهی جی خوی یَه پاروَه چو سَطلی بَسِّنیش هِمی زِی و یخایی پِشتُش یا وِ یا کَه. باز جیغُّش ورو دارت : بِدو بِدو تَموم شُد ... گربه زنِ عموم شُد .. نوبَره بَهاره َبسَّنی ... رویی چرخُش جی چِن تا لوله یی کاغِذی بوی گو تویی هرکومیش یَه جور نویی بَسِّنی خوری بوی. کَس سِرا بورایی بَسِّنی دِه شاهی ، بعد یَه ریالی و مَس سِرا جی بورایی بَسِّنی یی دو ریالی ... خوی یَه چِمچَه چو بَسِّنیش اِز تویی او سطل بِروتارت و لایی دو تا نوشو نا و وِ وَچ هاش دا.

سیگه گو زِنگی تفریحش اوخا وَچ ها هُرّی اِز مَدرسه بر وَسِّن . می جی خوی اییا بِر یومی یی . نیجَفَلی دارتو هومو طور قیلُش وِر دارت : بَسَّنی ... نوبَر بهاره بَسَّنی .. بِدو بِدو ... وَچَ ها جی دور و بِری چَرخُش کُپَّه گِرتایِن . هِر کومی یَه چییشی وات .. ایکی بَسِّنیش پییا، ایکی بی کایَه شیکَه و مَسخَره بازیش بروتارت . نیجَفَلی تا میش ایدی حال و احوالُش کَه . شُوات بَسِّنی توا عامو؟ می جی گو مَعلوم بوی جُوُوم چی هو . مالی جی می پیا ولی پول و پیلَه ییم نَدارت. یَه بَسِّنی یَه ریالیش بورام اوسات و شُوات : هگیر .. اوخور .. آخه تو هِمشهری خویومی ... ایکی از وَچَ شِمرونی ها خویوشُش لوس وَکَه گو می جی هِمشهری تویی . نیجَفَلی وِشُش وات : پس خوی زوون ما حرف ایزِن تا ایوینِم . پُرَه چووَه نَش فَهما. می بوراش تَرجُمم کَه گو واجه خوی زوونی نایینی حرف ایزِن .اون جی گو مالی وَچَ یی تُخسی بوی شُوات : نایینیو سولاخ پایینی یو . چیکیری پیکیری .. و وِ شیوی خِندش زِی .. نیجَفَلی جی گو ایفهمی نفهمی ناراحت گِرتایَه بوی یَه دستیش وِ شیوی تِلُش کیشا و شُوات : بفرما اینَم بستنی شما . نیجَفَلی هِمشهری ما بوی و خوی هِم تویی یَه کیه وَ زندگیمی کَه .. شیوی مومزادَه صالحی تجریش .

نیجَفَلی اهلی کومال آوای بوی و می اهلی بِک آوای . یَه جَوونی  خوشگل و خوش اخلاق گو یومیَه بوی تِهرون به قولی خویُش پول وَیوزَه . آخه شیپیا عاروسی کیرَه .. نومزِه یوش کَرتَه بوی و شیپیا اینشاء الله پاییز عاروسی کیرَه .. اسمی نومزِیُش لیلا بوی .. بورایی هِمی دو شیَه بوی یَه دستگاهی گِرامافونُش هَگیرفتَه بوی خوی چِن تا صفحه یی گِرد گو هِرکُم یَه ترانَه ییش دارت. ایکی اِز دو تَرانه ها نازونی مالی کُم خواننده بوی ولی وروشوخونت : « لیلا در واکُن منم / پشت در واکُن منم / این چه در واکردنه / اینکه اقبال منه » نیجَفَلی شِوا وقتی اِز سری کار پِه تومَه دو گرامافونُش روشنی کَه و هیمی دو ترانَش وَرَسا . گاهی وقتا صوبحا جی پیش اِز دو گو اوشو بَسِّنی اوساجَه هیمی دو ترانش وَرَسا  . صودایی گرامافون بیلِند بوی و ما جی گو تویی یورتایی بی وَ بویِم وَمی رَسا .. کاری نیجَفَلی بَسِّنی فروشی بوی . هِمه یی سِرمایَش یَه چرخ بوی و دِم و دَستگاش. هِر رو صبحی زو شوی شیری تازَش ایری . هِمی دو جور دو تا قالبی یَخ  . بعد خوی شیکِر و دِیا یَه بَسِّنی یی خوشمزه ییش سات گو یور و سیل ایکِر . مالی شیرین و خونیک بوی . مِثلی وَرف . بویی هِل و گولابُش جی دارت گو آدِمُش دیوونَه وَ کَه .

شیوات نیجَفَلی مالی لیلاییش وَسا. می وَرَسایه بویی گو خوی هِم چِقَد کایه شیکَه . وِ رَدّی هِموشی نا تا تِگی مِلکا. اِز اووِر تا بالایی چَه هایی قونات. پیش اِز دو گو خوی هِم  نومزِی بِن پیغُم و پَسغُمُ شیدارت . آمّا وقتی نومزِی گِرتایِن اَبی هیشکی جَلودارُشی نَبوی .. خوی هِم کارو شیکَه. زیمینوشی کِنت. اویاری شیکَه . دیرَختوشی دِر تِکنا . عَلفوشی وِر چِنت .. یا سری دورون شُویِن . دورن مالی کاری سَختی بوی .. نیجَفَلی خوی یَه داسی تیز گِلی مُلی ساقَه هایی گندمُش وُونت و دَسَّه دَسَّه شیکَه . بعد دسَّه هاش رویی هِم نا تا یَک وافَه اُوساجَه .. وقتی وافَه تومومی گِرتا لیلایی جی رَسا و وِرُ شیگیرفت. نَه ایکی نَه دوتا . چِن تا وافَش وِرگیرفت و یَه پِشتَش سات. بعد دو پِشتَش وِر کولی بَس و شوی طیرفی خِرمِنا .. کیفوشیکَه گو دوتایی رویی چُن وَ هنیگِن و خِرمِن اوکووِن . هِمو او موقَع بوی گو لیلایی یَه بیت شعرُش وروخُونت و نیجَفَلی ایکی بی . دو تا جَوونی عاشق و معشوق دوقد شعر و غیزِلُشی وروخونت گو رو شِو گِرتا و هَمه یی هوشَه ها گِندم. بعد مَشَهدی رمضون پِیی لیلایی تومَه و گِندُماش جِمی کَه . بعد سکینه اِنجویی رَمَضون تومَه و سیوَلاش جیا وَکَه . بعد یَه رویی گو کِمی هُوا خوب بوی و یَه نیسیمی تومَه نیجَفَلی و لیلا هِرکُم یَه کومونوشی وِرگیرِفت و  وِطیرفی وا و َویسایِن تا گِندما اِز کَهش جِیا وَکیرِن .. وقتی خِرمِناشی جِم کَه وایی تندی جی تومَه و پاییزُش تارت.

هونُم هُووا مالی سرد نگِرتایَه بوی .. هونُم وَرف و وارون نَیومیَه بوی .. یَه شِوی خونیک بوی گو نیجَفَلی عاروسی شکَه .. می جی بویی . ویروم هو نیجَفَلی یَه لوباسی نووُش وَپوشته بوی . خوی چِن تا جَوونی آبادی شییَه بویِن حموم و ریشُش سه تیغَه کَرتَه بوی . سیبیلی قِیطُنی خوش او و رِنگیش جی دارت . به قولی خویُش فوکولشُش آلا گارسُن کَرتَه بوی و برقُشی زِی . مالیا یومیَه بوین عاروسی . از هیِمَه آبادی ها . هِیمه جورآدمی یومیَه بوی. دوتا مِری لوطی جی بویِن گو ایکیش سورنا شیزِی و ایکی خوی دایرَه مَجلسُش گرمی کَه . بعد از شوم خارت یَه نفِرجی بوی گو شیوات کایَه بِروتاره .. هِیکِلی گُندَه ییش جی دارت و شیَه بوی خویُشش سیاه وَ کَرتَه بوی .. یومَه یَخورده کایَش بِرارت . زوونُشش کَج و کولَه کَه و یَه شعراییش جی وِرو خونت گو می ویرُم نَهو . وَسَطی کایَه بِرارتُش یَه دفَه وِ رَدّی پُورَه چویی وَلی اللهش نا. پورَه چووَه وِ شیوی بیرِمبَش زِی و وِرُش مالا. دو مِری سیاه جی وِ رَدّی پورَه چووَه . وَچی ولی الله مِثلی طُلطُله اِزکوناری باغچَه وِروش مالا و اِز بِری کیَه بِر وَس تا خویُش وِ مایُش رَسنَه ... مایُش جی سیگه وِر وَس و خوی یَه مُشت گارامبی وِ تویی کلَّه یی مِری سیاهُش بَس. مِری سیاه یَه قیلُش وِردارت و شُوات : خُل و چِل می یی .. مِره یی خویوت...

شِو وِ آخر رَسا و عاروسوشی جی یارت . عاروس لُپایی سرخیش دارت و خوی پِرنَه یی سیفید و چایور گل گلی سواری یَه خری سیفید وَ بوی . زوماشی گو  هومو نیجَفلی بوی اِز کیَه بِرارت و اَفساری دو خِروشی وِ تویی دسُّش نا. نیجَفلی اِنگاری اَفساری دُنیاش وِ دَس گیرفته بوی . خوشحال و خِندُن وِ ره کَفت تا اوشو کیَه یی خویُشی . مردم جی پِشتی سِرُش . جِن و مِرد . تویی رَه وَ بوی گو ایکی روباعیش وِروخونت ایکی بی تیرقَّش تیرَکنا و ایکی بی جی خوی دَسمال رقصوشیکه .. سیگه اِز چن تا کوچَه اوشُویِن تا وِ بِری کیَه یی نیجَفلی رَساین .. یَه تخمی کَرکُشی وِ عاروس دا تا وِ بالایی بِر زینَه . عاروس تخمی کرکُش اوخوس ولی وِ بالایی بِر نرَسا و نیمَه رَه وَ دِرکَفت ... یَه تخمی کرکی بیشی اُو دا . نیجَفلی شُوات : سِفت اوخوس عاروس .. باری دوم  لیلایی سیگِه سِفتُش اوخوست گو تخمی کَرک وِ سقفی بالایی بِر یومَه و پَخش گِرتا . تیکَه هایی اِز زَردی تُخمی کَرک وِ سِر و کولی نیجَفلی ریت .. ِانجوا شوولولو شیکَه و مِرا صلواتُشی وِرسا .. عامو عبدالحمید جی تا دلوتی شیپیا روباعیش وروخونت ..« الله به نام بزرگ خدا .. / دوش دیدم که ملایک در میخانه زدند. کچلی را بگرفتند فر ششماهه زدند ... آخری هر روباعی جی  وروش خونت : فرق سر تا به کف پای محمد صلوات ..

ترجمه داستان را در ادامه مطلب بخوانید